ဖြစ်ချင်ခြင်း အိပ်မက်များ

သတ္တာနံ ဟိ န၀ န၀ မေ၀ ပီယံ ဟောတိ။
(ပုဂ္ဂိုလ်) သတ္တ၀ါမည်သည်ကား အသစ် အသစ်ကိုသာလျှင် မြတ်နိုးတတ်၏။

စာချတန်းစာဝါလိုက်စဉ်က စာချဆရာတော်ပြောပြလို့ ကြားနာခဲ့ရတဲ့ စာသားလေးပါ။ ဆရာကတော့ ကျမ်းညွှန်း၊ စာမျက်နှာ အတိအကျနဲ့ ပြောပြတာပါပဲ။ ကိုယ်တိုင်က မှတ်ဉာဏ် မကောင်းလို့ မေ့နေတာ။ ဒါကလဲ အားနည်းချက် တစ်ခုပေပဲ။ ဆရာကတော့ မင်းတို့လဲ စိတ်ကို ဘာဖြစ်ချင်တယ်ဆိုတာ စီစစ်ဆုံးဖြတ် ပြီးရင် ဖြစ်အောင်လုပ်လို့တော့ သြ၀ါဒပေးခဲ့တာပဲ။

ကိုယ့်ကိုယ်ကို ပြန်ဆန်းစစ်မိတော့ ငယ်စဉ်ကတည်းက ဖြစ်ချင်တာတွေ လုပ်ချင်တာတွေက အများသားပင်။ စိတ်ထဲမှာ ထင်ရာမြင်ရာကို ဖြစ်ချင်လုပ်ချင်စိတ်တို့ ဖြစ်ခဲ့ဖူးပြီ။ ဥပမာ။ ငယ်စဉ်ကလေးဘ၀က ကြည့်ခဲ့ဖူးတဲ့ ရာဇ၀င်ဇာတ်ကားတွေမှာ ဘုရင့်သားတော် မင်းသားလေးတွေဟာ အထိန်းတော် အချော့တော်တွေနဲ့ မုန့်ချိန်တန်ရင်မုန့်၊ ကစားချိန်တန်ရင် ကစား သူတို့ဘ၀မှာ (ရုပ်ရှင်သဘာဝအတိုင်း) ခန်းခန်းနားနား အဆင်ပြေပြေ နေတာကို တွေ့ရတော့ သူတို့လိုဖြစ်ရင် ငါလဲ မုန့်စားရမှာပဲဆိုတဲ့ အတွေးနဲ့ မင်းသားငယ် ဖြစ်ချင်မိပြန်ရော။ ဒီလိုနဲ့ ကလေးဘ၀မှာ အားကျစရာတွေ့ မြင်လေတိုင်း စိတ်ကူးနဲ့ ဖြစ်ကြည့်ခဲ့တာလဲ အခါခါပင်။

အဓိကပြောပြချင်တာကတော့ ပေါ်ပင်အရ ဖြစ်ချင်ခြင်းသာဖြစ်ပြီး၊ တကယ်ကြိုးစားအားထုတ်ဖို့ စိတ်မပါတော့ ဖြစ်ချင်ခြင်းတို့သည် စိတ်ကူးအဖြစ်သာ ပေါ်လာခဲ့ပြီး အငွေ့အဖြစ် ပျောက်ပျက်သွားသည်သာ။ အညာမြို့လေး တစ်မြို့မှာ စာသင်သားဘ၀စတင်တော့ ဆရာ့ဆရာတွေ ပြောပြောနေတဲ့ ဘယ်ဆရာတော်ကတော့ စာဘယ်လိုတော်တာ ဘာဘွဲ့ထူး ဂုဏ်ထူးတွေ ရတာစသဖြင့် ကြားရဖန်များတော့ ထုံးစံအတိုင်း မတန်ရာကို ဖြစ်ချင်မိပြန်ရော။ ဆရာတွေကတော့ ထောပနာပြုလေရဲ့.. ရပါလိမ့်မယ် အဘိဝံသ၊ ရပါလိမ့်မယ် သာမဏေကျော်၊ ရပါလိမ့်မယ် ဂုဏ်ထူး၊ နင်လို စိတ်ရူးပေါက်မှ ထလုပ်တက်တဲ့ ၀ီရိယမျိုးနဲ့တော့ တဲ့။ ဟုတ်လဲဟုတ်ပေမည်။ သူများတွေဖြစ်နေလို့ ဖြစ်ချင်တာပဲသိသည် တကယ်စိတ်ထဲက အားကျိုးမာန်တက် ကြိုးစားလိုက်မည် ဟူသော အတွေးသည် စိုးစဉ်းမျှပင်မရှိခဲ့။ အပျင်းမှာတော့ ချန်ပီယံတွင် လောက်သည်သာ။

ဒါတင်လားဆိုတော့ မဟုတ်သေးပေ။ ဘောလုံးအကြောင်း စာစောင်တွေ ဖတ်တော့ ဘောလုံးသမားက ဖြစ်လိုက်ချင်သေးသည်။ ရိုးရိုးတော့မဟုတ် ကမ္ဘာကျော်ဘောလုံးသမား။ ကွင်းထဲမှာတော့ ဘောလုံးကို တည့်အောင်ကန်တက်ဖို့ မပြောနဲ့ အပင်ပန်းမခံနိုင်တာနဲ့ပဲ ဘောလုံးပွဲဆို အတန်းကျောင်းသားဘ၀မှာ အရွေးခံရတာတောင် ဝေးဝေးရှောင်ခဲ့၏။ သူများကန်ကြတာကိုတော့ အားပေးတက်၏။ ကိုယ်မှ မပင်ပန်းတာကိုး။

သိုင်းစာအုပ်တွေ၊ သိုင်းကားတွေကြည့်မိတော့လဲ သူတို့လိုဖြစ်ချင်မိပြန်၏။ မှတ်မှတ်ရရ စာသင်တိုက်မှာ စာချဆရာတော်များကို နွေကျောင်းပိတ်ရက်တစ်ခုမှာ မိမိမွေးရပ်ကို အလည်ပင့်သွားဖူး၏။ ကိုယ့်အရပ်မှာ နာမည်ကြီးတဲ့ ရှင်မတောင်ဆိုတာကို သူတို့တက်ကြည့်ချင်၊ ရောက်ဖူးချင်သည်ဆိုတော့ စားစရာသောက်စရာ (ဆွမ်းကိစ္စ) စုံအောင်စီစဉ်ပြီးလိုက်ပို့ဖြစ်၏။ တကယ့်တောင်တက် သမားကြီးများလို ဂိုက်ဖမ်းတဲ့သူက ဖမ်း၊ တောကစား ထွက်ဟန် ပြုတဲ့သူကပြုနဲ့ သူငယ်ချင်းတစ်စုလဲ ပါ၏။ ကိုယ်ကတော့ သိုင်းရူးရူးသူဆိုတော့ တောင်တက်လမ်းမှာ တွေ့တဲ့လှိုင်ဂူတိုင်းကို ၀င်ဝင်ကြည့်ဖြစ်၏။ မင်းဘာဝင်ကြည့်တာလဲဟူသော စာချဆရာ၏ အမေးကို တပည့်တော် သိုင်းကျမ်းများတွေ့မလားလို့ ၀င်ကြည့်မိကြောင်း ဖြေလိုက်တော့၊ ...........မသား၊ သိုင်းကျမ်းတော့တွေ့မှာ မဟုတ်ဘူး မြွေကိုက်လို့သေနေမှ ဟုတ်ပေ့ ဖြစ်နေမယ်ဟု ကြိမ်းမောင်ခံရဖူး၏။ မျက်နှာတစ်ဘက်သို့ လှည့်၍ တော်တော် ရူးတဲ့ကောင်ဟု မှတ်ချက်ပြုရင်း ပြုံးနေသည်ကိုတော့ မသိဟန်ဆောင်နေလိုက်မိသည်။

ဆရာတော်မှ မေးဖူး၏ မင်းဘာဝါသနာပါလဲတဲ့။ ဟိုစပ်စပ်ဒီစပ်စပ် အစုံလုပ်နေတော့ တစ်ခုခုကို အာရုံစိုက်ဇောက်ချ လုပ်စေချင်သည့်သဘောပင်။ စာအုပ်လဲ(ပြဋ္ဌာန်းစာအုပ်ကလွဲလို့) ဖတ်လိုက်သည်၊ ကျောင်းမှာ အလှူရှင်ကမ္ဗည်း လာလာရေးပေးတဲ့ ပန်းချီဆရာနဲ့တွေ့တော့လဲ စာအုပ်ထဲမှာတောင် ခြစ်မြောက်ခြစ် လုပ်တော့သည်၊ ဗိန္ဓောဆရာနဲ့တွေ့တော့လဲ ဆေးအကြောင်းတွေ လေ့လာလိုက်သေးသည်၊ သူများတွေ တရားဟောဓမ္မကထိက အဖြစ်အောင်မြင်နေတော့လဲ ကိုယ့်အသံကိုယ်မှ အားမနာ ကိုယ်လဲဖြစ်လိုက်ချင် သေးတော့ သည်သာ။ တကယ်ရင်ထဲ အသည်းထဲက ဖြစ်ချင်စိတ်မပါတော့ ၀ီရိယလဲ အိပ်ပျော်နေတော့သည်။ ဘယ်အရာကိုမှ ဖြစ်မြောက်အောင် လုပ်ဖို့တော့ မတက်နိုင်ခဲ့ပေ။ အသစ်အသစ်ကိုသာ မြတ်နိုးမိတဲ့ သတ္တ၀ါစစ်စစ် ဖြစ်နေတော့သည်။ တပည့်တော် ကောင်းတာမှန်သမျှ ၀ါသနာပါပါတယ်ဘုရား ဟုသာ ဖြေလိုက်မိတော့သည်။

အခုလဲကြည့်တော့ သူများတွေ ဘလော့ဂါဆိုတော့ ကိုယ်လဲ လော့ဂ်ချင်မိသေး၏။ ဒီလိုနဲ့ စပြီးကတည်းက ရေးမိရေးရာတွေရေးရင်း အခုဆိုနားထားတာ အတော်ပင်ကြာပေပြီ။ ဓမ္မဂင်္ဂါကြီး အတင်းခိုင်းလို့ ဟာသာ စာစုလေးကို ဘာသာပြန်နေ၍ တော်သေးသည်။ အင်္ဂလိပ်ဘာသာပြန်ဖို့ လေ့ကျင့်ပြီးသား ဖြစ်သွားလိမ့်မယ် အဲဒါလေးတွေပြန်ကြည့်ကွာတဲ့။ သူကစေတနာနဲ့ ခိုင်းခြင်းပင်။ မစ္စတာပါရဂူကတော့ ဘလော့ဂ်စဖွင့် ကတည်းက ကူညီပေး လမ်းပြပေးတဲ့ သူပင်။ တစ်နေ့တော့ သူကမေး၏ မင်းဘာတွေ ရေးနေလဲတဲ့၊ ရေးစရာမရှိတော့ မရေးတာကြာပီလို့။ ......ရှိးတဲ့မှပဲ အလေ့အကျင့်ရအောင် ဖတ်မိ၊ တွေးမိတာ လေးတွေရေးပေါ့ကွတဲ့။

ဓမ္မဂင်္ဂါ၊ မစ္စတာပါရဂူတို့၏ အားပေးမှုအရ.. ကိုယ့်အကြောင်းကိုပြန်ပြောပြရင်း.. ဟိုစပ်စပ်ဒီစပ်စပ် အသစ်အသစ် တွေကိုသာ လိုက်နေမိတဲ့ သတ္တ၀ါစစ်စစ်ဖြစ်ပါကြောင်း။

(စိတ်ကို ဧကဂ္ဂတာကျအောင် စုစည်းပြီး ဖြစ်ချင်တာမှန်သမျှဖြစ်နိုင်ကြပါစေ)