Wednesday, May 26, 2010

မဃဒေ၀မှာတမ်းနှင့် အဆုံးစွန်လူသား



ရှေးသရောအခါက မိထီလာပြည်၌ တရားနှင့်အညီမင်းပြုသော မဃဒေ၀မည်သောမင်းသည် ဖြစ်ပေါ်ခဲ့၏။ ထိုမင်းသည် ဥပုသ်နေ့တိုင်း သီလဆောက်တည်လေ့ရှိ၏။ မိမိခေါင်း၌ ဆံပင်ဖြူတစ်ချောင်း ပေါက်ခဲ့သော ပြောပြရန် ဆတ္တာသည် (ဆံညှပ်သမား)အားမှာထားလေ၏။ နှစ်များစွာကြာသောအခါ ဆတ္တာသည်သည် မင်းကြီးခေါင်း၌ ဆံဖြူတစ်ချောင်း ပေါက်နေသည်ကို မွေးညပ်ဖြင့်နှုတ်၍ မင်းကြီးအား ပြသလေ၏။

မင်းကြီးလည်း ထိုဆတ္တာသည်အား ရွာဆုပေး၍ သားတော်ကြီးအိမ်ရှေ့မင်းသားကို ခေါ်ပြီး “ချစ်သား၊ ငါ့အား သေမင်းတမန်များသည် ဖြစ်ပေါ်၍ လာလေပြီ၊ ငါသည် လူ့လောက၌ ကာမဂုဏ်တို့ကို ခံစားပြီးဖြစ်၍ နတ်ကာမဂုဏ်တို့ကို ရှာရန် အချိန်တန်ပြီ၊ သင်သည် နိုင်ငံကိုအုပ်ချုပ် မင်းလုပ်လော့” ဟု မိန့်ကြား၍ ထီးနန်းကို လွှဲအပ်လေ၏။ ခေါင်း၌ ဆံဖြူတစ်ချောင်းပေါက်လျှင် တော်ထွက် တရားရှာမှီးခြင်းဟူသော ကျင့်ဝတ်ကို စဉ်လာမပျက် ဆက်လက်လိုက်နာရန်နှင့် မင်းကျင့်တရားနှင့်အညီ တိုင်းပြည်အုပ်ချုပ် မင်းလုပ်ရန်လည်း သွန်သင်ဆုံးမခဲ့လေ၏။

မဃဒေ၀မင်းသည် ထိုနေ့မှစ၍ ဖန်ရည်ဆိုးသော အ၀တ်ကို ၀တ်ဆင်ကာ မဃဒေ၀ဥယျာဉ်တော်၌ အရပ်ဆယ်မျက်နှာတို့သို့ ဗြဟ္မ၀ိဟာရတရားဖြင့် ဖြန့်ကျက်၍ နေထိုင်တော်မူ၏။ ထိုမင်းသည် ကလေးသူငယ်ဘ၀ဖြင့် နှစ်ပေါင်းရှစ်သောင်း လေးထောင်၊ အိမ်ရှေ့မင်းအဖြစ်ဖြင့် နှစ်ပေါင်းရှစ်သောင်း လေးထောင်၊ ပြည့်ရှင်မင်းအဖြစ်ဖြင့် နှစ်ပေါင်းရှစ်သောင်းလေးထောင်၊ ရသေ့ရဟန်းအဖြစ်ဖြင့် နှစ်ပေါင်း ရှစ်သောင်းလေးထောင် နေပြီး ကွယ်လွန်သောအခါ ဗြဟ္မပြည်သို့ လားရောက်ရလေ၏။

သားတော်မင်းမှစ၍ ရှစ်သောင်းလေးထောင်သော မင်းတို့သည် မဃဒေ၀မင်းကြီး၏ နည်းလမ်း၊ သွန်သင်ဆုံးမချက်နှင့်အညီ မင်းပြု၍ မိထီလာပြည်သည် နှစ်ပေါင်းများစွာ စည်ပင်ဝပြောလျှက် ရှိခဲ့ပေ၏။ ဆံဖြူတစ်ပင် ပေါက်သည်နှင့် အိမ်ရှေ့စံကို နန်းလွှဲအပ်၍ မိမိတို့အတွက် သံသရာရိက္ခာထုပ်ကို ကိုယ်စီထုပ်ပိုး သွားနိုင်ကြလေ၏။

လူတို့၏ ပထမအရွယ်သည် ပညာရှာမှီးခြင်းဖြင့် ကုန်ဆုံးစေခြင်းကို ထိုမင်းသားတို့သည် ပြုမူဆောင်ရွက် နိုင်ခဲ့ကြ၏။ အချိန်တန်အရွယ်ရောက်လို့ ဒုတိယအရွယ်မှာ တာဝန်ထမ်းဆောင်ဖို့ အချိန်ကျစဉ်မှာလဲ သူတို့သည် တာဝန်ကျေပွန်ခြင်းဖြင့် မိထီလာပြည်ကြီးကို သာယာဝပြော စေခဲ့၏။ တတိယအရွယ် တရားရှာရမည်အချိန် ဆံပင်ဖြူတစ်ချောင်း ပေါက်တယ်ဆိုရင်လဲ သေမင်းတမန်အမိန့်တော်ဟု ခံယူလျှက် တရားဘာဝနာဘက်၌ စိတ်ကိုညွှတ်စေကာ သားတော်ကြီးကို ထီးနန်းလွှဲအပ်ကာ တောထွက်ရဟန်းပြုခြင်းဖြင့် ဗြဟ္မပြည်သို့ တက်လှမ်းနိုင်ခဲ့ကြ၏။

မဃဒေ၀မင်း၏ လမ်းစဉ်နှင့် ထိုလမ်းစဉ်အတိုင်း လိုက်နာဆောင်ရွက် သော ရှစ်သောင်းလေးထောင်သော မင်းအပေါင်းတို့၏ စိတ်ဓာတ်သည် ချီးကျူးစရာပင် ဖြစ်၏။ နေမိမင်း လက်ထက်အထိ ရှစ်သောင်း လေးထောင်သောမင်းတို့သည် မိထီလာပြည်၏ အစဉ်အလာကို ထိန်းသိမ်နိုင်ခဲ့ကြလေ၏။

နေမိမင်း၏သားတော် ကဠာရဇနက မင်းလက်ထက်တွင်ကား ဘိုးဘေးတို့၏ အစဉ်အလာသည် ပျက်၍သွားတော့၏။ ဆံဖြူတစ်ခေါင်းလုံးပေါက်သော်လည်း ထီးနန်းမစွန့် တောမထွက်ပဲ အသက်ထက်ဆုံး မင်းစည်းစိမ်ကို ခံစားလျှက် နေတော့၏။ ထိုမင်းအား မိထီလာပြည်၏ အဆုံးစွန်သောမင်းဟူ၍ ပိဋကတ်တော်၌ မှတ်တမ်းပြုထားလေ၏။

.............................

မြတ်စွာဘုရားရှင် မိထီလာပြည်၊ မဃဒေ၀သရက်ဥယျာဉ်၌ သီတင်းသုံးနေတော်မူစဉ် ပြုံးရယ်ခြင်းပြုတော်မူရာ အရှင်အာနန္ဒာလျှောက်ထားတောင်ပန်၍ ဟောကြားတော်မူသော မဃဒေ၀ဇာတ်တော်ကို ဖတ်ရှုခံစားမိခြင်းပါ။

မြတ်စွာဘုရား၏ နိဂုံးဟောကြားချက်ကတော့.........

“အာနန္ဒာ၊ ထိုကောင်းမြတ်သော ကျင့်ဝတ်တို့ကို ထားခဲ့သော မဃဒေ၀မင်းကား အခြားသူမဟုတ်၊ ငါပင်ဖြစ်၏။ ငါထားခဲ့သော ထိုကောင်းမြတ်သော ကျင့်ဝတ်ကို နောက် မင်းအပေါင်းတို့သည် လိုက်နာကျင့်သုံးခဲ့၏။ သို့သော် ထိုကျင့်ဝတ်သည် ၀ဋ်ဆင်းရဲမှ ငြီးငွေ့ခြင်း၊ စွဲမက်မှုကင်းခြင်း၊ ကိလေသာချုပ်ငြိမ်းခြင်း၊ အထူးသိခြင်း၊ ထိုးထွင်းသိခြင်း၊ ဆင်းရဲငြိမ်းခြင်းအလို့ငှာ မဖြစ်၊ ဗြဟ္မပြည်သို့ ရောက်ရုံအလို့ငှာသာဖြစ်၏။”

“အာနန္ဒာ၊ ယခုငါထားခဲ့သည် အင်္ဂါရှစ်ပါးနှင့်ပြည့်စုံသော အရိယာမဂ်တည်းဟူသော ကျင့်ဝတ်သည်ကား ၀ဋ်ဆင်းရဲ၌ ငြီးငွေ့ခြင်း၊ စွဲမက်မှုကင်းခြင်း၊ ကိလေသာချုပ်ငြိမ်းခြင်း၊ အထူးသိခြင်း၊ ထိုးထွင်းသိခြင်းအလို့ငှာ ဖြစ်၏။ အာနန္ဒာ၊ သင်တို့သည် ဤကျင့်ဝတ်ကို ဆက်၍လိုက်နာကျင့်သုံးကြလော့၊ သင်တို့သည် ငါဘုရား၏ အဆက်အနွယ် အဆုံးစွန်သောသူများ မဖြစ်ကြကုန်လင့်”။

(သုတ္တန္တပိဋက၊ မဇ္ဈိမနိကယ်၊ မဇ္ဈိမပဏ္ဏာသ၊ မဃဒေ၀သုတ္တ)


No comments:

Post a Comment